اسلام آباد۔12ستمبر (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) وزیر اعظم دی خصوصی ہدایت اُتے سیلاب توں متاثرہ علاقیاں کیتے 5 ہزار خیمے اتے امدادی سامان پنجاب روانہ کر ݙتے۔ این ڈی ایم اے موجب اسلام آباد اچ موجود ویئر ہاؤس توں روانہ کیتے ڳئے امدادی سامان اچ پنج ہزار خیمے شامل ہن، جو پنجاب پجݨ اُتے پی ڈی ایم اے دے حوالے کیتے ویسن۔ ترجمان ݙسایا جو ہݨ تئیں پنجاب کوں تقریباً ݙو ہزار ٹن امدادی سامان فراہم کیتا ڳئے جئیں اچ خیمے، کمبل، مچھر دانیاں، رضائیاں، فولڈنگ بیڈ، پاݨی دے کین، فلٹریشن پلانٹس اتے 17 کشتیاں شامل ہن۔ این ڈی ایم اے سارے سول اتے فوجی اداریاں دے نال نیڑے دے رابطے اچ ہے اتے امدادی سرگرمیاں دی چووی گھنٹے نگرانی کریندی پئی اے تاں جو متاثرہ عوام تئیں ویلھے تے ریلیف پجایا ونڄ سڳے۔
