اسلام آباد۔2مارچ (اے پی پی):وزیراعظم عمران خان آکھیے جو عوام دے جان و مال دا تحفظ ساݙی اولین ترجیح اے، ملک اچ یونیورسل ایمرجنسی ہیلپ لائن مشکلات اچ پتھے لوکاں کیتے ہنگامی مدد دا اہم ادارہ ہوسی۔ ٻدھ کوں وزیراعظم عمران خان دی صدارت اچ پاکستان ایمرجنسی ہیلپ لائن (پی ای ایچ ای ایل )911 دا جائزہ اجلاس منعقد تھیا ۔ اجلاس اچ وزیراعظم دے معاون خصوصی سیاسی امور ڈاکٹر شہباز گل، چیئرمین نیشنل ٹیلی کمیونیکیشن کارپوریشن انجینئر معراج گل، نیشنل انفارمیشن ٹیکنالوجی بورڈ دے ایگزیکٹو ڈائریکٹر سیّد حسنین عباسی کاظمی اتے ٻئے متعلقہ سینئر حکام شرکت کیتی جݙاں جو پنجاب، سندھ ، خیبرپختونخوا، بلوچستان، گلگت بلتستان اتے آزاد کشمیر دے چیف سیکرٹریز ویڈیو لنک دے ذریعے شریک تھئے ۔ وزیراعظم عمران خا ن سارے متعلقہ حکام کوں ہدایت کیتی جو او رمضان المبارک دے مقدس مہینے اچ ایں سروس دے حقیقی آغاز توں پہلے ہیلپ لائن دے آزمائشی اتے سافٹ لانچ دے ذریعے ایں کوں بغیر کہیں رکاوٹ دے فعال بݨاوݨ کیتے سارے ضروری اقدامات چاتے ونڄن ،وزیراعظم کوں ایں موقع تے ݙسایا ڳیا جو ہنگامی خدمات ݙیوݨ آلے ادارے فائر بریگیڈ، پولیس ، طبی معاونت،قدرتی آفات توں بحالی اتے موٹروے پولیس سودھے خدمات ݙیوݨ آلے سارے 36 انفرادی ایمرجنسی نمبرز کوں پاکستان ایمرجنسی ہیلپ لائن 911 اچ ضم کر ݙتا ویسی ۔ کوئی وی ضرورت مند شخص 911 تے کال کریسی تے کال سنٹر ایندی کال کوں متعلقہ حکومتی ادارے کوں پٹھ ݙیسی ۔ ڈیجیٹل پاکستان اقدام دے حصہ دے طور تے اے وزارت انفارمیشن ٹیکنالوجی و ٹیلی کمیونیکیشن اتے وزارت داخلہ دا مشترکہ منصوبہ اے۔ نیشنل ٹیلی کمیونیکیشن کارپوریشن اتے وزارت انفارمیشن ٹیکنالوجی دا نیشنل انفارمیشن ٹیکنالوجی بورڈ ایں منصوبے دے سوکھیں تکمیل کیتے ضروری تکنیکی معاونت اتے انفراسٹرکچر ݙیسی جݙاں جو وزارت داخلہ وفاقی تے صوبائی سطح تے مختلف ایمرجنسی رسپانس سروسز کیتے رابطہ دی ذمہ وار ہوسی۔
