اسلام آباد۔6نومبر (اے پی پی) وفاقی وزیر اطلاعات تے نشریات مریم اورنگزیب آکھیا جو وزیراعظم محمد شہباز شریف 7 اتے 8 نومبر کوں ݙو ݙینھ دے دورے تے مصر ویسن، شرم الشیخ اچ کوپ ۔ 27 اچ شرکت اتے عالمی رہنماواں نال ملاقاتاں کریسن۔ کانفرنس اچ 197 رکن ملک شریک تھیندے پن۔ پاکستان کوپ۔ 27 کوں ٻہوں اہمیت ݙیندے۔ کانفرنس اچ موسمیاتی تبدیلیاں دے نال نال موسمیاتی انصاف دے مسئلیاں تے فوری کاروائی دی لوڑھ تے غور کیتا ویسی۔ آݙت وار کوں آپݨے ہک بیان اچ مریم اورنگزیب آکھیا جو وزیراعظم ورلڈ لیڈرز سمٹ اچ سربراہان مملکت نال خطاب اچ اہم مسئلیاں تے پاکستان دا موقف پیش کریسن۔ انہاں آکھیا جو وزیراعظم شرم الشیخ اچ کانفرنس دے موقع تے اقوام متحدہ دے سیکریٹری جنرل انتونیو گوئترس نال وی ملاقات کریسن۔ دورے اچ وزیراعظم شہباز شریف اپݨے ناروے دے ہم منصب دے رلے ہک اعلیٰ سطحی گول میز کانفرنس اچ وی شریک تھیسن۔ مریم اورنگزیب آکھیا جو وزیراعظم7 نومبر کوں ”مڈل ایسٹ گرین انیشیٹو سمٹ” اچ وی شریک تھیسن۔ کانفرنس دی میزبانی سعودی عرب دے ولی عہد اتے وزیراعظم محمد بن سلمان کریندے پن۔ وزیراطلاعات آکھیا جو وزیر اعظم سمٹ دی سائیڈ لائنزتے کئی عالمی رہنماواں نال ݙو پاسہ ملاقاتاں وی کریسن۔ کوپ-27 ہک ایجھے ویلھے تھیندا پے جݙاں پاکستان دے لکھاں شہری اتے دنیا دےٻے حصیاں اچ کروڑاں لوک ماحولیاتی تبدیلی دے شدید منفی اثرات دا سامݨا کریندے پن۔ ایں رجحان اچ ساریاں توں ودھ متاثر تھیوݨ آلے ہک ترقی پذیر ملک دے طور، پاکستان ماحولیاتی یکجہتی اتے موسمیاتی انصاف دی فوری ضرورت کیتے ہک مضبوط کال کریسی27اقوام متحدہ دے فریم ورک کنونشن آن کلائمیٹ چینج کانفرنس(یو این ایف سی سی سی ) دے تحت فیصلہ سازی دا ساریاں توں وݙا ادارہ اے جیڑھا ماحولیاتی تبدیلی نال نبڑݨ کیتے سانجھی کوششاں دا جائزہ ڳھنݨ اتے اڳوں ودھاوݨ کیتے سالانہ بنیاداں تے اجلاس کریندے۔مریم اورنگزیب آکھیا جو پاکستان ایں کانفرنس اچ گروپ آف۔ 77 چائنہ دی سربراہی وی کریسی۔
