اسلام آباد۔19اکتوبر(اے پی پی)صدر مملکت آصف علی زرداری آکھیے جو چھاتی دے کینسر توں اموات دی شرح ڳھٹاوݨ کیتے ودھ آگاہی مہم اتے کٹھیاں کوششاں دی لوڑھ اے۔ صدر مملکت چھݨ چھݨ 19 اکتوبر کوں چھاتی دے سرطان دے خلاف منائے ونڄݨ آلے ڄڳ ݙیہارے تے اپݨے سنیہے اچ آکھیے جو ڳھٹ اتے درمایہ آمدنی آلے ملکاں اچ چھاتی دا کینسر نہ صرف سب توں ودھ تشخیص تھیوݨ آلا کینسر اے ٻھل تریمتیں اچ اموات دی سب توں وݙی وجہ وی اے، ایں عالمی ݙینھ دا مقصد چھاتی دے سرطان دے خلاف شعور ودھاوݨ، ویلھے تے مرض دی تشخیص اتے علاج یقینی ٻݨاوݨ اے، ایں واری ایں ݙینھ دا موضوع “کہیں کوں وی چھاتی دے کینسر دا کلہا سامݨا نئیں کرݨا چاہیدا” اے۔ صدر مملکت آکھیے جو اے موضوع ایں بیماری نال نمٹݨ آلے ہر ڄݨے دی حمایت، یکجہتی اتے ݙیکھ بھال دی اہمیت یاد ݙویندے، ساکوں غلط فہمیاں مکیندے صحت مند طرز زندگی کوں ترڄیح ݙیوݨی ہوسی اتے ایں بیماری دے خلاف سڄاکا تھیوݨا پوسی، پاکستانی تریمتیں کوں چھاتی دے کینسر بارے آگاہی ݙیوݨ، باقاعدگی نال معائنہ کراوݨ اتے میموگرافک سکریننگ کیتے کوششاں ودھاوݨیاں ہوسن۔ انہاں آکھیا جو پالیسی سازاں اتے صحت حکام کوں بیماریاں تے قابو پاوݨ دیاں سرگرمیاں دی منصوبہ بندی، بشمول بہتر علاج اتے مریضاں دی انفرادی ݙیکھ بھال تے توجہ ݙیوݨی ہوسی تاں جو تریمتیں دی جان بچائی ونڄ سڳے اتے ایں بیمارتی توں بچایا ونڄے، ایں سانڳے میڈیا آڳاہی کھنݙاوݨ کیتے کردار ادا کرے۔ انہاں اکھیا جو چھاتی دا کینسر سب توں ودھ تشخیس شدہ اے ڄیڑھا ڳھٹ اتے درمیانی آمدنی آلے ممالک اچ تریمتیں دے مرݨ دی وݙی وڄہ اے، اے واقعات جنوبی ایشیائی ممالک اچ عام ہین، پاکستان اچ ہر 9 اچوں 1 تریمت کوں چھاتی دے سرطان دا خطرہ اے، ایں بیماری دی دیر نال تشخیص پاروں شرح اموات ودھ ویندن، علاج کیتے معاشی رکاوٹاں وی وݙی وڄہ ٻݨدن، آئو اساں مریضاں، انہاں دے ٹٻراں اتے چھاتی دے کینسر توں بچ ونڄݨ آلیاں کوں ودھ مدد، ݙیکھ بھال اتے امید ݙیواوݨ دا عہد کروں، امید اے انفرادی، ادارہ جاتی اتے قومی سطح تے ساݙیاں کٹھیاں کوششاں لوکاں دی مجموعی صحت اتے بہبود کوں بہتر ٻݨیسن، اساں پاکستان اچ چھاتی دے کینسر نال اموات دی شرح ڳھٹاوݨ اچ کامیاب رہسوں
