اسلام آباد۔26دسمبر (اے پی پی) وفاقی وزیر اطلاعات، نشریات، قومی ورثہ تے ثقافت عطاءاللہ تارڑ پاکستان اتے ترکیہ وچال ثقافتی رابطے دی لوڑھ تے زور ݙیندیں ہوئیں آکھیا جو پاکستان اتے ترکیہ دی لازوال دوستی سرحداں دی محتاج کائنی، ݙوہیں ملکاں وچال سیاحتی شعبے اچ تعاون دے موقع موجود ہن۔ ݙوہیں ملک دے ہک ٻئے نال سدابہار تعلقات ہن، پاکستان اتے ترکیہ وچال سیاحتی شعبے اچ تعاون دے وسیع موقع موجود ہن۔ یونس ایمرے انسٹیٹیوٹ ٻݨݨ نال ترک ثقافت کوں سمجھݨ اچ مدد ملسی۔ خمیس کوں یونس ایمرے انسٹیٹیوٹ ، ترکش کلچر سنٹر دی افتتاحی تقریب توں خطاب کریندیں ہوئیں آکھی۔ وفاقی وزیر آکھیا جو پاکستان اتے ترکیہ دی لازوال دوستی سرحداں دی محتاج کائنی، ݙوہیں ملکاں وچال سیاحتی شعبے اچ تعاون دے موقع موجود ہن۔انہاں آکھیا جو عظیم صوفی شاعر یونس ایمرے جنہیں یونس درویش وی آکھیا ویندے۔ دی شاعری اتے کہاوتاں اڄ وی ترک ثقافت اچ اہمیت رکھیندن۔ انہاں آکھیا جو ثقافت ہک ٻئے کوں آپت اچ جڑیندن۔ وفاقی وزیر اطلاعات ڈاکٹر خلیل توکار کوں خراج تحسین پیش کریندیں ہوئیں آکھیا جو انہاں پاکستان اچ رہ تے ترک ثقافت کوں جینویں ودھائے، داد دے مستحق ہن۔ وفاقی وزیر ترکیہ نال سانجھ ودھاوݨ کیتے استنبول اچ ہیڈ آف کمیونیکیشن نال ملاقات دا ذکر کریندیں ہوئیں آکھیاجو جئیں طریقے نال ترکیہ دے ڈرامے پاکستان اچ مقبول ہن اینویں پاکستان دے ڈرامے ترکیہ اچ پیش کیتے ونڄ سڳدن۔ انہآن آکھیا جو پاکستان اتے ترکیہ وچال ٻہوں شئیں سانجھی ہن جو زبان، ثقافت، مذہب دی شکل اچ نظرسن۔ انہاں آکھیا جو ثقافتی طور اساں اینویں مضبوطی نال جڑیے پئیوں جو علامہ اقبال دا ہک مزار قونیہ دے اندر وی اے۔ مولانا رومی دے مزار نال علامہ اقبال دی علامتی قبر ٻݨائی ڳئی اے۔ ایں تعلق کوں بیان کرݨ اوکھا اے۔ یونس ایمرے انسٹیٹوٹ کلچرل سنٹر ٻݨݨ نال ثقافت اتے عوام دے آپسی رابطے ودھسن اتے ترکیہ دی ثقافت کوں اساݙے لوکاں کوں سمجھݨ اتے اڳوں ڳھن ونڄݨ اچ مدد ملسی۔ وفاقی وزیر اطلاعات عظیم شعراءڈاکٹر علامہ محمد اقبال اتے یونس ایمرے بارے ثقافتی گروپس ٻݨاوݨ دی لوڑھ کوں اجاگر کریندیں ہوئیں آکھیا جو پاکستان اتے ترکیہ دے ادیب ہک ٻئے دے ملکاں دے دورے کرن۔ ݙوہیں ملکاں دے لوکاں وچال جڑت ٻݨے اتے اساں دنیا کوں امن، بھائی چارے اتے جڑت دا سنیھا ݙے سڳوں۔
