اسلام آباد۔27اکتوبر(اے پی پی)وفاقی وزیر داخلہ رانا ثنا اللہ آکھیے جو عمران نیازی ہک وفا مسلہ ٻݨدا ویندے جیندا علاج کرݨ قوم دی بھلائی کیتے بہتر اے، چیئرمین پی ٹی آئی نفرت اتے قوم کوں ٻھڑاوݨ دی ڳالھ کریندن، وݙے چور تے ݙاکو تاں آپ عمران خان ہین۔ اسلام آباد اچ پریس کانفرنس کریندے وزیر داخلہ رانا ثنا اللہ آکھیا جو اڄ عمران خان دا اصل چہرہ ݙس ڳئے، جیکر کوئی عمران خان دے مفادات کیتے کم کرݨ توں انکار کرے تاں غدار قرار ݙتا ویندے، ایندا حال ݙیکھو جو اے کیویں نفرت اتے قوم ٻھڑاوݨ دی سیاست کریندا پئے، عمران خان نیوٹرل لفظ کوں مندا ٻݨا ݙتے، میر جعفر و میر صادق، نیوٹرل، غدار اتے جانور جھیں لفظ آکھین، اڄ وݙا کڄھ سامݨے آئے۔ وزیر داخلہ مقتول صحافی ارشد شریف بارے الیندے آکھیے جو عمران خان ارشد شریف دی شہادت تے پروپیگنڈا کیتے، عمران خان دا بیانہ اے ارشد شریف کوں بیرون ملک ونڄݨ کیتے ݙرایا ڳئے ولا ٻاھرو ٻھیڄ ݙتا ڳئے جو تھریٹ الرٹ کے پی کے حکومت جاری کیتا ہا، سوال اے وج او کینیا اچ کیویں، کتھاں اتے کیندے کولو راہندے پئے ہن، متنازع فارم ہاؤس بارے رپورٹ وی تیکھے مل ویسی۔ انہاں آکھیا جو عمران خان سائفر دا ڈرامہ رچائے اتے ڈپلومیٹک اسٹیٹس کوں تباہ کیتے، آڈیو لیک نال وی انہاں دا اصل چہرہ سامݨے آئے۔ انہاں آکھیا جو عمران خان 6 مہینے توں زور لیندے پن جو فوج سیاست اچ آوے اتے انہاں کوں ولا ڳھن آوے۔
