اسلام آباد ۔ 18 اگست (اے پی پی) وزیراعظم محمد نواز شریف دہشت گردی دے متاثرین سانگے جامع پالیسی وضع کرنڑدی ہدایت کیتی اے جو جاں بحق تھیونڑ آلیاںدے خانداناں کیتے آمدن، تعلیم اتے روزگار دے پیکیج دی حامل ہوونڑی چاہیدی اے۔ انھاں اے ہدایت خمیس کوں اتھاں وفاقی کابینہ دے اجلاس دی صدارت کریندے ہوئے ڈتی۔ تلاوت کلام پاک دے بعد وفاقی کابینہ کوئٹہ اچ دہشت گردی حالیہ واقعہ اچ جاں بحق تھیونڑ آلے بندیاں کیتے فاتحہ خوانی کیتی۔ وزیراعظم ہدایت کیتی جو ملک بھراچ دہشت گردی دے متاثرین کیتے جامع پالیسی وضع کیتی ونجے، اے پالیسی جاں بحق تھیونڑ آلے بندیاں دے خانداناں کیتے مربوط آمدن، تعلیم اتے روزگار دے پیکیج دی حامل ہوونڑی چاہیدی اے، اے پالیسی غور کیتے آندے کابینہ اجلاس اچ پیش کیتی ونجے ۔ پاک۔چین اقتصادی راہداری بارے اچ تفصیلی بریفنگ دے دوران وزیراعظم ایں گالھ تے زور ڈتا جو پروگرام اچ شامل منصوبہ جات حکومت دی اولین ترجیح ہن تاں جو ویلے تے پیش رفت کو ںیقینی بنڑاونڑ کیتے کوششاں کیتاں ونجن۔ وزارت منصوبہ بندی، ترقی تے اصلاحات کو ںہدایت کیتی گئی اے جو او توانائی اتے بنیادی ڈھانچہ دے شعبیاں اچ اولین منصوبہ جات دی 2017-18ء تئیں تکمیل کو ںیقینی بنڑاون۔ انھاں آکھے جو بجلی دے موجودہ شارٹ فال اتے آندی طلب کو ںپورا کرنڑ کیتے انھاں منصوبوں تے تکھے پیشرفت ضروری اے۔ انھاں آکھے جو ارلی ہارویسٹ منصوبیاں دی تکمیل 2018ء دے ہنالے دے موسم اچ لوڈ شیڈنگ دے خاتمہ اچ بہوں معاون ہوسی۔ وزیراعظم محمد نواز شریف آکھے جو پاک چین اقتصادی راہداری دے مغربی روٹ تے نشابر پیشرفت تھیندی پئی اے، مقامی آبادی کیتے روزگار دے موقع نکلسن جیندے نال اقتصادی سرگرمی تھیسی اتے قومی دولت اچ ودھارا تھیسی۔ انھاں آکھے سی پیک نال نہایت پسماندہ علاقیاں سمیت پاکستان دے مختلف حصیاں اچ فیدے یقینی ہوسن، ایندے نال نہ صرف پاکستان دے 20 کروڑ عوام جڑے ہوئے ہوسن جڈاں جو پورے خطہ دے عوام، کمیونٹیز اتے ریاستاں وچال تعاون دے راہ کھلسن۔ کابینہ کو ں ڈسایا گیا اے جو سی پیک دے تحت کل حجم دا نمایاں حصہ عمل پذیر اے جڈاں جو بقیہ پائپ لائن اچ اے۔ وزیراعظم تھرکول منصوبہ کیتے آپدی بھرپور حمایت داظہار کریندے ہوئے آکھیا جے 50 سال پہلے ایندی صلاحیت توں فیدہ چاندا ویندا تاں قوم ہنڑ توانائی دی برآمد کنندہ ہوندی۔ گوادر پورٹ پراجیکٹ اتے ایندے نال جڑے انفراسٹرکچر سہولتاں تے ہنڑ تئیں تھیونڑ آلی پیشرفت دا وی اجلاس اچ جائزہ گھدا گیا۔ وزیراعظم متعلقہ محکمیاں کو ںگوادر ہوائی اڈے اتے ایسٹرن ایکسپریس وے تے جلد ی توں جلدی کم دے آغازتے پیشرفت کرنڑ دی ہدایت کیتی۔ انھاں آکھیا جو گوادر دے ٹیکنیکل اینڈ ووکیشنل ٹریننگ انسٹی ٹیوٹ تے کم تکھیاں بنیاداں تے کیتا ونجے اتے جتی جلدی ہووے ایکوںفعال بنڑایا ونجے۔ وزیراعظم متعلقہ وزارتاں کوں ہدایت کیتی جو پن بجلی منصوبیاں سانگے اراضی دے حصول دے عمل کوں تکھے کریندے ہوئے توانائی اتے بنیادی ڈھانچہ دے اجزاء سمیت مجموعی اقتصادی ترقی کیتے پیش بین حکمت عملی اختیار کیتی ونجے تاں جو آندیاں نسلاںدی ضروریات پوریاں تھیسن ۔ کابینہ سرکاری ملازمین کوں ریٹائرمنٹ توں پہلے رہائش یا پلاٹاں دی فراہمی دے مقصد دے تحت نجی شعبہ دے اشتراک نال لینڈ ڈویلپمنٹ سانگے جوائنٹ وینچر پالیسی دے حوالہ نال ہائوسنگ و ورکس ڈویژن دی سمری دی اصولی منظوری ڈیندے ہوئے پالیسی رہنما اصولولاں کوں بیا بہتر بنڑاونڑکیتے ہک کمیٹی بنڑائی اے۔ اے پالیسی وفاقی حکومت دے ہک لکھ ملازماںکو ںپلاٹاں دی فراہمی دی حامل اے۔ وزیر ہائوسنگ تے تعمیرات اکرم درانی، وزیر داخلہ چوہدری نثار علی خان اتے وزیر قانون زاہد حامد تے مشتمل ہوسی اتے اے کہیںڈوجھے رکن کوںایندے اچ شامل کر سگدی اے۔ اے کمیٹی کابینہ کو ں آپدی رپورٹ پیش کریسی۔ کابینہ پاکستان اتے ترکمانستان وچال دفاعی تعاون بارے ایم او یو دی منظوری ڈتی۔ پاکستان اتے جاپان (جائیکا) وچال توانائی دے شعبیاں دی اصلاحات دے پروگرام II کیتے قرض معاہدے تے دستخط وی مؤثر بہ ماضی منظوری ڈتی گئی اے۔ کابینہ سرکاری شعبہ دی آڈیٹنگ اچ تعاون بارے ملائیشیا دے نیشنل آڈٹ ڈیپارٹمنٹ اتے پاکستان دے آڈیٹر جنرل آفس وچال مفاہمتی یادداشت دی منظوری ڈتی۔
.jpg)
