لاہور۔7مارچ(اے پی پی):وزیر اعلی مریم نواز شریف دی اڳواݨی اچ صوبائی کابینہ دا پہلا اجلاس تھئے جیندے اچ پنجاب گورنمنٹ رولز آف بزنس 2011 دے تحت وزرا کوں کابینہ دی کارروائی دے طریقہ کار تے تفصیلی بریفنگ ݙتی گئی۔ کابینہ ”رمضان نگہبان” ریلیف پیکیج2024، ضلعی سطح تے سستے رمضان بازار لاوݨ، سٹینڈنگ کمیٹی برائے فنانس اینڈ ڈویلپمنٹ، سٹینڈنگ کمیٹی برائے قانونی امور اتے سٹینڈنگ کمیٹی امن و امان ٻݨاوݨ دی منظوری ݙتی۔ ݙسایا ڳیا جو رمضان نگہبان ریلیف پیکج پروگرام دے تحت 65 لکھ توں ودھ ریلیف پیکج مستحق لوکاں دے گھراں کوں پچایا ویسی جیندے نال سوا 3 کروڑ لوک فیدہ چیسن، ایں سانڳے پیکٹ اچ 10کلو اٹا، 2 کلو چاول،2 کلو کھنݙ، 2 کلو گھیو، 2 کلو بیسن ہوسی۔ وزیر اعلی کھاوݨ پیوݨ دیاں شئیں دے معیار کیتے ضلعی انتظامیہ اتے پنجاب فوڈ اتھارٹی کوںا قدامات دی ہدایت کیتی۔ انہاں اربن یونٹ اتے سپیشل برانچ دیاں ٹیماں کوں فیلڈ سروے کر تے رمضان نگہبان ہیمپرز ونݙاوݨ دی رپورٹ پیش کرݨ دی وی ہدایت کیتی جو رمضان پیکج دی ونݙ دی نگرانی پی آئی ٹی بی دی ایپ اتے ڈیش بورڈ نال کیتی ونڄے، رمضان اچ مہانق کرݨ آلے اتے ذخیرہ اندوزاں تے اکھ رکھی ونڄے، پرائس کنٹرول مجسٹریٹس کوں باقاعدہ تربیت ݙتی ونڄے۔ اجلاس اچ صوبائی وزرا، چیف سیکرٹری، انسپکٹرجنرل پولیس، چیئرمین پلاننگ اینڈ ڈویلپمنٹ بورڈ، سینئر ممبر بورڈ آف ریونیو، چیئرمین پی آئی ٹی بی، سیکرٹریز خزانہ، اطلاعات اتے ٻئے متعلقہ محکمیاں دے افسران شرکت کیتی۔
